Lan Ikuskaritzak argitaratutako txostenaren arabera, Construcciones Lasuen konpainiak langileen lanaldiak luzatu zituen San Juan eta Lehendakari Agirre kaleetan egindako obretan, Eraikuntzako Hitzarmen Kolektiboa urratuta. Udalaren obra horiek aurreikusitako epea baino hilabete lehenago amaitu ziren.
Hona hemen LAB sindikatuaren oharra oso-osorik:
LABek Lan Ikuskaritzan salaketa jarri zuen, Zornotzako kaleetan obretan zebilen Construcciones Lasuen enpresak Bizkaiko Eraikuntzako hitzarmen kolektiboan ezartzen diren lan baldintzak urratzeagatik.
Andoni Aguirrebeitia alkatea berehala atera zen medioetan Construcciones Lasuenen lana babestera.
Apirilaren 15ean jakinarazi digute lan ikuskariaren txostena, eta honetan zehazten da arau urratze akta luzatu duela, Bizkaiko Eraikuntzako Hitzarmen kolektiboa bete ez delako, izan ere, hitzarmen honetan zehazten den lanaldiak handitu baitira.
Obra hilabete lehenago bukatu zela kontutan izanda, ez geneukan inolako zalantzarik lanaldien luzapen bat existitu dela, eta ondorioz, Bizkaiko eraikuntzako lan egutegia eta lanaldia urratzen ari zela.
Lanaldien luzapenek ere prekarietatea suposatzen dute, lan osasunean eragin zuzena dutelarik.
Eraikuntza berez, gogorra da, eta denok arreta berezia jarri beharko genioke sektore honi.
Gaur egun, eraikuntza sektorea bereziki, obra publikoan oinarritzen da, eta tamalez, kasu honetan bezala, ez dira hitzarmeneko eta sektoreko lan egutegiko joko arauak errespetatzen.
Azpimarratu nahi dugu obra publikoetan prekarietatearekin bukatu daitekeela, borondate politikoa baldin badago. Alderdi politiko guztiak interpelatzen ditugu, batik bat EAJ, lehiaketa publiko eredu desberdin bat ezartzeko lan egin dezaten, langileon lan baldintzak eta lan osasuna bermatuko dituena, eta azpikontratazioan prekarietatea desagertaraziko dituena.
Prekarietateak gaixotu eta hil egiten du, eta horrexegatik eta kontutan izanda, laster lan osasunaren nazioarteko eguna izango dela (Apirilak 28), LABek determinazioz eremu guztietan borrokan eta egoera hauek salatzen jarraituko duela berresten du, eta aldi berean lanean jarraituko du beste eredu baten alde, langile klasearentzat lan osasuna eskubide bat izan dadin.
Bukatzeko, apirilaren 28an burutuko diren mobilizazioetan parte hartzera animatzen zaituztegu.